Nú styttist sumarið óðum í annan endann og ekki tekur verra við. Berin og sulturnar. Berjaspretta er með mesta móti í ár. Vinur Matarkörfunnar tíndi til dæmis fullan innkaupapoka af aðalbláberjum í Borgarfirðinum á aðeins einni klukkustund. Dágott tímakaup það, fyrir utan hreyfingu og útiveru.

Bláber eru full af vítamínum, andoxunarefnum og ýmsu fleira sem líkaminn þarf svo mikið á að halda.

Leiðbeiningarstöð heimilanna gaf nýlega út bækling sem heitir Sultur-saft-hlaup og mauk úr berjum og ávöxtum. Í honum eru uppskriftir, leiðbeiningar og ráð um hvernig má borða ber allt árið án þess að verða kalt, vegna næringarskorts.

Frekari upplýsingar eru á heimasíðu Leiðbeiningarstöðvarinnar.

Tækninni fleygir fram á undra hraða. Nú er meira að segja hægt að fá forrit í iPhone-inn (væntanlegt í aðra síma ss. Blacberry, Android ofl.) sem er háþróuð útgáfa af gamla góða innkaupalistanum. Í forritinu, sem heitir Grocery Gadget, flettir maður upp vörutegundum í gagnagrunni og setur í innkaupalistann sinn. Hægt er að skanna strikamerki vara og fá þannig allar upplýsingar um þær beint í símann. Það er leikur einn að stofna nýjar vörur, eins og til dæmis skyr, sem ekki er í gagnagrunninum (útlendingarnir eru ekki enn búnir að átta sig á þeirri snilld nema í litlum mæli). Tegund umbúða, mælieiningu og verð er hægt að skrá og hafa þannig góða yfirsýn yfir innkaupin. Það er vitaskuld þægilegt að geta tekið slíkan rafrænan innkaupalista með í búðina og haka jafnóðum við þegar varan fer í innkaupakerruna.

Stór kostur við innkaupalistann er að það er hægt að taka mynd af vörunni, til dæmis eftirlætis sjampóinu sínu. Svo þegar makinn fer í innkaupaleiðangur er nánast útilokað að hann kaupi rangt sjampó vegna þess að hann hefur mynd af brúsanum í símanum (bjargar heimilisfriðnum jafnvel!). Annar eiginleiki forritsins er að hægt er að senda vörur á listann úr öðrum símum. Til dæmis ef það gleymdist að setja brauðrasp á listann og betri helmingurinn er farinn í búðina. Með einu handtaki er hægt að bæta brauðraspinu við innkaupalistann hans.

Frekari upplýsingar er að finna á heimasíðu fyrirtækisins. Forritið kostar fimm dali í iTunes búðinni (hægt er að fá einfalda útgáfu af því ókeypis).

Vinur Matarkörfunnar hefur gert tilraunir undanfarið með að brjóta uppþvottakubbana sína í tvennt og jafnvel þrennt. Niðurstaðan er sú að leirtauið var alltaf jafn hreint, sama hve lítill uppþvottakubburinn var sem í vélina fór. Stundum er uppþvottavélin ekki alveg full hlaðin og því engin ástæða til að spandera heildum kubbi. En heilt yfir er óhætt að brjóta kubbinn í tvennt. Það fækkar kubbakaupum um helming á einu ári. Safnast þegar saman kemur.

Það er nú ekki oft sem sparnaðarráðin eru bæði góð fyrir budduna og heilsuna. En þetta sparnaðarráð er einmitt þannig. Næst þegar þú ferð í búðina, láttu þá vera að aka og gakktu heldur ef þess er frekast kostur. Vitandi bak við eyrað að það þarf að ganga heim með pokana hefur ótrúlega jákvæð áhrif á innkaupin. Þau verða léttari. Færri þungir hlutir enda í innkaupakerrunni. Til dæmis kannski bara ein gosflaska í stað þriggja. Gangan til og frá búðinni er auk þess fyrirtaks heilsubót. Sem sagt: Allir græða og spara.

Glöggur lesandi benti á að með því að labba sparast líka bensín og notkun á bílnum. Takk fyrir það.

Margir sjá varla fyrir sér hvernig hægt var að lifa án síma í vasanum fyrir nokkrum árum. Það var raunar ekkert mál og er ekki neitt mál í dag heldur. Þeir sem eru ekki á ferð og flugi vegna vinnu eða lífsstíls eru engu betur settir með síma í vasanum og himinháan reikning í póstkassanum. Hraðinn sem allt var að drepa 2007 er sjálfur dauður. Nú er hægt að slaka á, hringja í heimasíma, ræða um veðrið í stað verðbréfa og gróður í stað gróða. Svo er ekki galið að styðjast við Skype forritið sem áður hefur verið nefnt á þessum vettvangi. Það kostar sáralítið að hringja í heimasíma úr því og ekkert milli tölva.